انتظار مؤقت

2008-01-06T12:29:00.000-08:00

انا راااااجع

وفاتت ايام و اسابيع و شهور من اخر مره كتبت فيها و عدى حاجات و احداث و ناس و اتجرحنا و جرحنا و ضحكنا و بكينا و بكينا و
انتقمو مننا و اتقمنا منهم و كانت هيصه بس المهم عايشين والاهم راجعين و بكره احلى من النهارده و النهارده احلى من امبارح و كل يوم هوه يوم حلو عشان صحينا فيه و شوفنا فيه يوم جديد بحلو الدنيا و مرها ....انا راااااااااااجع

يا عيني عليكي يا طيبه...!!! ياعيني عليكي

2007-10-03T14:19:00.000-07:00

ياعيني عليكي يا طيبة لما بتضيعي منا لما بنصحى نلاقينا بقينا حد غيرنا وفي عز الإحتياج لحضن يضمنا وفي عز الإشتياق لحضن يضمنا قادرين إزاي ندوس على قلب حبنا وبقينا إزاي كدة.......................................أجمل ما فينا قلب أصبح حتة حجرأتعلم الخيانة و اللعب بالبشرومين اختار لنا وإحنا إزاي رضينا نعيش وحوش في غابة ونقول مكتوب علينا و بقينا إزاي كدة يا عيني عليكي يا طيبة لما بتضيعي منا.................................وآه من يوم هييجي مليان جرح وألم هتدور الدايرة بينا و هندفع التمن وتصرخ مهما تصرخ ولا حيسمعك مفيش مركب حتقدر بالعمر ترجعك وبقينا إزاي كدة يا عيني عليكي يا طيبة لما بتضيعي منا لما بنصحى نلاقينا بقينا حد غيرنا وفي عز الإحتياج لحضن يضمنا وفي عز الإشتياق لحضن يضمنا قادرين إزاي ندوس على قلب حبنا........... وبقينا إزاي كدة ....؟؟؟؟؟؟؟؟

رمضان كريم

2007-09-12T11:57:00.000-07:00

اللهم تقبل منا رمضان

كل سنه و انتي طيبه كل سنه و انتي متهنيه كل سنه و انتي جميله

رمضان كريم

2007-09-10T16:34:00.001-07:00

كل عام و انتو بخير

رمضان كريم

انا رااااجع و حكتب بس محتاج وقت الاقي نفسي و تحياتي لكل الي بيسال عني

2007-08-23T05:01:00.000-07:00

انا رجعت

انا جيييييييييييييت ورجعت من السفر و انتهت الاجازه و كانت اجمل ايام عمري و يا رب تعود تاني
قبل اي حاجه انا بعتذر للاستاذه شيماء الجيزي و بطلب منها السماح و انا متاكد انها حتقدر الضروف الي منعتني من الاتصال بيها و بعتذر بشده .....نفسي ابدا اكتب عن كل حاجه حصلت في الاجازه بس محتج وقت اضبط اوضاعي عشان كانت اجازه طويله و اشوفكو قريبا جدا و بشكر كل الي سالو عليه في غيابي ووحشتوني اوي...و اراكم قريبا

2007-07-01T13:34:00.000-07:00

انتظار مؤقت مغلقه لدواعي السفر

على بلد المحبوب ودينييييييييييييييييييييي

ايها السيدات و الساده مدونين و زوار تعلن مدونة انتظار مؤقت عن توقفها عن الانتظار المؤقت مؤقتا و لمده غير معلومه الي الان و ذالك لدواعي السفر و السياحه في بلاد الحبايب مصر المحروسه و قاهرة المعز و اسكندريه الماريه و اسمع سلاااام بين شطين و ميه و احب في هذه المناسبه ان اوجه كلمه للشعب المصري و اقولهم انا جييييييييييييييييييييييييييييييييييييييي يا جدعاااااااااااااااااااااان

و تحياتي من القلب و اراكم على خيرمن مصر انشاءالله

للتواصل مع المدونه

entezarmo2kat@yahoo.com

2007-06-26T13:29:00.000-07:00

جاااااااااااااالي تااااااج يا جدعاااان جالي تااااج..اهه عادي انا متعود طبعا يجيلي تاجات مش تاج واحد اه واحد فتك يقولي فين مفيش فالمدونه اي تاج قبل كده؟ حقولو عادي في مدونه تانيه
سريه محدش يعرف سكتها ..عموما التاج ده من العزيزه المدونه الالمعيه و البنت الشقيه.وشوشني و زي ما يكون تدبيسه التاج ده بس تدبيسه بشياكه القصد منها ان بدل ما انا بتلطع في مدونات الناس اقعد شويه في مدونتي و اعمل حاجه بس جت بشياكه............. المهم التاج عباره عن تلات اختبارات.

الاول :انت شبه مين من القاده

التاني :شبه ايه من الافلام

الثالث:شبه مين من شخصيات مسلسل فريندز

النتيجه يا حضرات كانت

اولا:شبه مين من القاده و الزعماء

جون كينيدي (يسمى أيضاً جون فيتزجيرالد كينيدي أو جون إف. كينيدي أو جاك كينيدي ) هو الرئيس السابق (الخامس والثلاثين) للولايات الامريكية المتحدة. تولى الرئاسة خلفا ً للرئيس دوايت أيزنهاور وقد خلفه نائبه ليندون جونسون ولد في 29 مايو، 1917 وتوفي مقتولاً في 22 نوفمبر، 1963 في دلاس، تكساس وقد أُتّهم لي هارفي اوسولد باغتياله.........(ده نقلا عن ويكيبيديا)..واخدين بالكو من حكاية توفي مقتولا دي و الله انا دايما حاسس اني حموت كده زي احمد زكي في فيلم شادر السمك المعلم احمد ابو كااامل..اخرتي وحشه انا عارف بس الراجل كندي ده كان كويس و كان ليه دور تقريبا في تحرير السود في امريكا و حاجات كده و اول انسان مشي على القمر كان في عهده مش متاكد بس غالبا يعنيالمهم انو لازم يطلع راجل كويس عشان انا شبهو ..طبعا مش في الشكل الراجل ده زي القمر و انا ..ما علينا ان قصدي في الشخصيه يعني

ثانيا :شبه ايه من الافلام

انا بصراحه مفهمتش الاختبار ده اوي الي هوه شخصيتي شبه ايه من الافلام بس المهم كانت النتيجه الفيلم ده و شكلو كده زي افلام الرعب بس الي فهمتو اني دائما بحاول استكشاف و العثور على نفسي ..ايوه اصل ان ضايع و تايه و مش لاقيني و لو حد يعرف انا فين يقولي عشان انا ضايع مني من زمان و نفسي الاقيني

ثالثا:شبه مين من شخصيات مسلسل فريندز

انا بجد في دي مبسوط اوي عشان انا بحب الشخصيه دي جدااا و لما خلصت الاختبار و طلعت نتيجتو اني شبه جووي انا اتبسط اوي عشان هوه شخصيه في المسلسل طيبه و جدعه صحيح بتاع نسوان شويه و دي انا مش فيه الخصله دي و الحمدلله ...ايه محدش يتريق دي كلها اشاعااات و الله مظلوم ايوه انا عارف انتي بالذات حتقولي ايه بس و الله اشاعات عموما ده شخصيه عسل اوي

في النهايه انا دوشتكو معايه و كل تاج و انتو طيبين و حمررو لمين ليمين لمين ...حيعرف لما يجيلو التاج الي حبعتهولها او ابعتهولو

..................

ده مكان الاختبارات التلاته للعايز يجرب و يعرف
الاختبار الاول
الاختبار التاني
الاختبارالتالت

2007-06-17T14:20:00.000-07:00

ده ايميل جالي قولت انشرو عشان الشباب الغلبان يشوف ايه الي بيحصل فيه

أولا : الولد بيحب البنت الرقيقه رفعوا صوتكم يا بنات ....و أول ما تشوفى حاجه وحشة .. سورقى (يغمى عليكى) من كتر الرقة عيطى

كتير . العياط دليل على الاحساس المرهف . أوائى له .. نكدى عليه الليلة ....ثانيا الولد بيحب البنت الرومانسية سبلى له .اسرحى كتير كلميه عن القمر و حاجات من دى .قوليله شايف القمر يا عتريس لازم تكونى هيمانه و انتى بتتكلمى . و يكون صوتك واطى .. وشوشة ....ثالثا : الولد بيحب البنت المؤدبه قولى له انه اول واحد فى حياتك حتى لو كنتى متجوزة قبل كده و حامل فى توأم..و لو سأل على انتفاخ بطنك قولى له كيس دهنىو لو عارف و متأكد انه كان لك علاقات كثيرة مثله:دى كلها اشاعات ده هما اللى كانوا معجبين بيا لكن انا ولا سألت فيهم كلهمرابعا : الولد بيحب البنت الاستايل styleكل ما تشوفى حاجه جديدة قلديها . يقولوا الموضه الشعر الاصفر ..... اضربيه اصفر .. الموضه القصير .. قصريه ..مش مهم شكلك ايه .. ماتصدقيش اللى تقولك ما تخديش من الموضه الا اللى يناسبك ..دى بتغير منك و مش عايزاكى تبقى على الموضه .ملحوظه : لو مش عارفه ايه الموضه اختارى لك واحدة معينة او مذيعة و قلديها .. خليكى نسخة منها ....خامسا :الولد بيحب البنت الدلوعة ادلعى ياختى انت و هى . ما تبقوش دكر .سادسا : الولد بيحب البنت الجذابه اللى بتكون محور اهتمام الآخرين فهميه ان في آخرين كتير معجبين بيكىو قولى له : ارجوك اوعى تغير انا حواليا كتير .ولا بيهمنى أبدا منهم ايه يعنى اكون حلوة فى عينهم .ألفى قصص وهمية عن الأولاد الهيمانين فيكى و اللى انتى مدوخاهم بسحرك و جمالك .سابعا : الولد بيحب البنت اللى بتحسسه برجولته و تحسسه بنفسه ايه ده ! .. ايه العضلات دى كلها .. دى احلى عضلات شفتها فى حياتى .. يا سلام !! ايه الشياكة دى كلها . انت أشيك ولد شفته فى حياتى ..(مش مهم هو لابس ايه . انبهرى و خلاص ) .يا سلام !! انت تقاطيع وشك حلوه بشكل ( حتى لو كانت ملخبطه ) و طول مانتى >قاعده اشكرى فيه خليه كده قاعد نافش ريشه . و فرحان بنفسه .ثامنا : اتمحكى فيه ( الزقي له )خليكى دايما معاهكل شويه كلميه فى التليفون بأى حجة . قابليه فى كل حته يروحها . إعملى عليه كماشة . بحيث مايعرفش يفلفص منك و لا يشوفش غيرك ادامه .... روحى له الشغل لاكبسى عليه مع السكرتيره .تاسعا عددى مواهبك اكلك لازم مظبوط قوليله انا ملحى فى الاكل لا كتير ولا قليل وبعمل شاى سكر زياده . وبلون البيض المسلوق ....عاشرا رغم حبك الشديد للحريه والانطلاق قوليله انت مالك وقتى وتفكيرى مش عارفه اعمل حاجه الا انى افكر فيك مليت عليه ايامى شغلت لى الزمن النتيجة :لو الولد وقع فى دباديبك و قال عاوز يرتبط بيكى : اوعى تقولى ايوه ! لااااا .. اتقلى شوية . اعملى نفسك يتفكرى .. سهريه .. لوعيه ... بهدليه ..... لكن ماتتقليش العيار ليطير منك .لو الولد ما سألش فيك و لا عبرك . و لا أخد باله منك أصلا يبقى بنت تانيه سبقتك ليه ....ملحوظة : كررى الخطوات من 1 - 10مع ولد تانى بعد جمع معلومات و عمل تحريات عنه و التأكد من انه فاضى . غير مرتبط .. و ربنا يوفقك

دي بروتوكلات حكماء البنات....

2007-05-31T15:29:00.000-07:00

توضيح مهم

لكل اصدقائي و الناس الي دايما بتسعدني و تشرفني و تاخد من وقتها و تقرا حاجه انا كاتبها لكل الناس دي انا مديون ليهم بتوضيح عن البوست الي فات ...يا بني ادمين انا و الحمدلله مؤمن بالله و مؤمن انو فضلنا على كل خلقه و بحمد ربنا على نعمو و بخاصه نعمة العقل التي انعم بيها علينا و فرقتنا عن باقي خلقه من الدواب...البوست الي فات بتاع لو كنت حمار ده كان تعبير عن احساس و خرج مني على شكل موضوع القصد منو التنفيس و مش التمني اني اكون حمار او اني اجرح في خلقة ربنا او اي حاجه من الحاجات الي سمعتها في التعليقات او الي جتلي على الاميل .. و اعتقد ان انا مقولتش اي حاجه تمس دين او عقيده و الله اعلم مافي الصدور انا مش محتاج ابرر نفسي لحد لكن انا بقدر كل انسان خد من و قتو و شرفني بزيارته و بعتذر اذا حد فهم حاجه انا مقصدتهاش انا نفسيتي كويسه الحمدلله و مش مدايق من حد او اي حاجه دي كانت مجرد فضفضه و الله

........................................

بيان للمجلس الاعلى للحمير

السيد البني ادم / انتظار مؤقت

بعد النظر في طلبك بالانتماء الي فصيلة الحمير نود ان نعلمك يا بني ادم ان طلبك مرفوض انت و اي بني ادم تاني عشان باختصار احنا مش حنرمرم

و شكرا

لو كنت حماااااااااااااار

2007-05-29T13:25:00.000-07:00

من اخر موضوع كتبتو سيطرت عليه فكره واحده و هيه اني لو كنت حمار... ايوه لو كنت حمار

لو كنت حمار مكنتش تعبت في حياتي و مكنتش فهمت حاجات كتير تعبت نفسيتي و بهدلتني يعني لو كنت حمار و بتفرج على نشرة التلفزيون مثلا و قالو ان في 50 ماتو في العراق و 10 في فلسطين و الف في افريقيا و كام امريكاني و كام اسرائيلي لو كنت حمار مكنتش فهمت ان دي مش بس ارقام دي ناس ماتت و سابت وراها يتامى و ارامل و صحاب ناس كانت عايشه بينا و بعدين ماتت و مبقتش موجوده ممكن حد فيهم في يوم من الايام يكون شخص اعرفو ولو كنت حمار مكنتش شوفت حمار ديكتاتور او حمار ظالم او حمار عندو جنون العظمه و بيدبح في الحمير زي ما هو عايز و لو كنت حمار مكنتش شوفت حمار بيعذب حمار تاني و يحط العصايه فيه و يزلو ولو كنت حمار مكنتش شوفت حمير عندهم حاجه اسمها معتقل لو كنت حمار مكنش طلع و احد من الحمير و قال ان لازم زميلتي في الشغل تطلع صدرها و ترضعني خمس رضعات مشبعات بالتقام الفم بالثدي عشان الخلوه الشرعيه ولو كنت حمار مكنتش اتعذبت لما اشوف طفل صغير بيشحت في اشارة مرور او طفله متعرفش هيه سمره و لا بيضه من الهباب الي عليها و هدومها مقطعه و هيه بتجري ورا عربيه بكام ميت الف جنيه عشان شلن لو كنت حمار مكنش ياثر فيه بكى طفل صغير لو كنت حمار مكنتش اخون حد و لا كانش حد خاني عمركو سمعتو عن حماره تسيب الي بيحبها و تمشي مع حمار غيرو و حمار بيخون الحماره الي بيعرفها عمركو سمعتو عن حمار امريكاني بيكره حمار عربي او حمار عربي بيكره حمار ايراني عمركو سمعتو عن حمار بيغير من حمار تاني او بيحقد عليه عمركو سمعتو عن حمار بياخد مكان حمار اكفأ منو بس عشان عندو واسطه ولو كنت حمار مكنتش اتحسر لما ابص من الشباك و الاقي كلب واخد كلبه ورا عربيه و نازل حب فيها و ملاين الشباب مكبوتين مش قادرين يمارسو حقهم الطبيعي عشان ازمة سكن و فلوس و حاجات كتير لو كنت حمار مكنتش اتحرق من جوايه لما اشوف واحده او واحد بيضيعو حياتهم و نفسهم و هما مش حاسين ولو كنت حمار مكنتش اشيل هم اي حد لا اخ و لا اخت و لا اب و لا ام لو كنت حمار مكونتش ادي قلبي لحد و احب فيه و بعدين الاقي الي بحبو مش من نصيبي و لا هوه حاسس بيه عمركو سمعتو عن حمار بيموت نفسو عشان حماره و هيه في نفس اللحظه بتكلم حمار تاني مش لو كنت حمار كان زماني باكل و بشرب و بنام و بمارس حياه طبيعيه من غير عقد لو كنت حمار مكنش يجيلي قولون عصبي و قرحه من كل الهم والقرف عشان مش بعرف ازعق و اتخانق مش لو كنت حمار كانت حياتي اسهل من كده لا ثانويه عامه و لا جامعه لو كنت حمار مكنتش حفهم و افكر في تحالف الامبرياليه الامريكيه و الصهيونيه العالميه للقضاء على القوميه العربيه و مش عارف ايه لاخر الكلام الملعبك لو كنت حمار مكنش حيكون عندي مشاعر كره و حب و مكنتش حتجرح و لا اجرح حد

في الاخر ارفع راسي لربنا و اسال ليه عرفتني اني انسان و ليه مشاعر و حقوق و انا مش حاخد حقي ليه يا ربي بندي الناس كل حاجه حلوه و مبنخدش منهم الا كل حاجه وحشه ليه اتكتب عليه اكون انسان مش حمار مفيش حماره خاينه و مفيش حمار منافق و مفيش حمار بيكره حمار صحيح نفسي اكون حمار بس مش قادر اسيب حد يستحمرني انا لو كنت حمار ........مكنتش كتبت الي كتبتو..استغفر الله العظيم

يخرب عقلك يا قلبي مجنون من بين الماجنين ..كلاكيت تاني مره

2007-05-19T15:02:00.000-07:00

جنون الحب جنون بتحبها يا قلبي؟ اشرب يا سيدي انت تسهر و تفكر و تعدي عليك اليالي الليله بسنه سهران تتقلب شمال و يمين مين سائل فيك؟ مين معبرك؟ تتكلم زي الشاحتين و بقيت من فئة المساكين و عقلك الله يعوض عليك فيه بقيت زي المجاذيب.. و مين يا مسكين سائل فيك ؟دوختيني و بهدلتني الله يجازيك ..كل ده و لا حد يا مسكين سائل فيك.. شويه تعمل زعلان و شويه تكون ولهان لاكده عاجب و لا كده نافع تفتكر هيه شيفاك ؟؟؟و لا حسه بيك؟؟؟ من بين الملاين؟.. يالله اشرب عشان تبطل تقول انا و الحب اتنين عاشقين ده انت وا لحب اتنين مجانين هيه في طريق و انت في طريق ولا التايهين و تعشم نفسك و تقول حنتلاقى.. خليك في الوهم يا مسكين أخرتك مستشفى الماجنين جزمه أنت في رجليها و مش عايش عشت البني ادمين خليك ورآها و شوف مين حيعبرك بعدها مين؟ انت الي جبتو لنفسك ماكنا في الدنيا عايشين هيه تفكر في الطلب قبل ما تفتح عين و تقفل عين تقولها امين و انت يدلدل لسانك يمكن تفتكر تبوصلك و تقولك انتى يا بني مين؟ ده شحات الغرام بيحنو عليه بكلمه و نظره و انت من بعيد لبعيد بتستنى يمكن قلب يحن ولا يميل ده عشم ابليس في الجنه.. انت بتحلم تقولك بص يا بني انت مين و انا مين؟ انت في الاخر خاين و اناني و هيه مين قدها مين و تفرح و تنبسط حتى لو كلمتك من حين لحين و هيه لو كلمتها كل يوم تقولك.. برضه انت مين؟ كل ده و شايل و ساكت و متقدرش تقول انا من كل ده فين ؟حواليها ناس و ناس و ناس و قلبها هنا يميل و هناك شويه يميل و تيجي عندك و تقولك.. انت برده مين؟ الله يخرب بيتك يا قلبي و الله ما عايز اعرفك لميت علينا الشماتين... و لو بايدي كنت اوقفك. وعن النبض امنعك. تستاهل الي بتعملو فيك و لو اشتكتلي في يوم مش حعبرك و اقولك هوه انا اعرفك؟؟ انتى يابني مين؟؟؟ ... يخرب عقلك يا قلبي مجنون من بين الماجنين

الله يا ست

2007-05-17T14:34:00.001-07:00

ثومه ام كلثوم دي عشرة عمر معايه من ايام المذاكره بليل و حب المراهقه و ثانويه عامه و قهوة بهلول في روكسي مصر الجديده و قهوة المعاشات ميدان تريومف مصر الجديده و الجامعه في اسكندريه على الكورنيش بليل في عز الشتا و السهر في البلكونه للصبح و الكتاب على نفس االصفحه بالساعات و ايدي تتعب مش من الكتاب من سماعة التلفون ثومه.. بيها يحلى السواقه و السفر و الطريق الطويل وسهر اليالي و البكى على حب راح او حب مولع الدنيا ميحلاش الا بثومه دلوقتي وقت الراحه بعد يوم طويل انك تقلب الراديو تلاقي ثومه بالصدفه بتغني الحب كلو او امل حياتي ...اجمل اغاني الست دلوقتي عندي هيه اغنيتها حتحنطر نفسي اركب الحنطور و اتحنطر بس المشكله في الحنطره نفسها انا مش بعرف اتحنطر نفسي بس يا ريت مكانش يتحنطر كان على عيني الحنطره و الله بس فين بقه الي يعلمني الحنطره

بنت الجيران

2007-05-16T14:25:00.000-07:00

بنت الجيران دي زي القمر و شقاوة الدنيا فيها و دايما مجنناني و بنت الجيران بتاعتي انا غير كل بنات الجيران بتاعة اي حد الي بينا حاجات كتير اوي و ياما زعلنا و ياما اتخناقنا و ياما استحملنا بعض و ياما و قفنا جمب بعض سافرت و مشيت من جمبي بس دايما حتفضل بنت الجيران جالي تلفون عرفت انها عملت الزايده و تعبانه اتصلت بيها و اول مره في حياتي اسمع صوتها كده تعبان و مرهق متعود دايما عليها كلها حيويه و شقاوه و احيانا طولت لسان بس المرادي حسيت انها بجد تعبانه مكنتش احب اسمع صوتها كده بس انشاءالله تقوم بالسلامه و ترجع لشقاوتها تاني ...بدعيلك من قلبي يا بنت الجيران تقومي بالسلامه

A dood

الصيف و انا

2007-05-12T16:11:00.000-07:00

الصيف و بلاويه و الي بيجرى فيه ... انا انسان صيفي مع اني مواليد برج الدلو يعني مولود في الشتا بس بعشق الصيف و بكره الشتا بحس بحريه و راحه اكتر في الصيف و في الشتا بحس بخنقه و بكون متكتف و بكون كسلان اوي في الصيف بكون نشيط و بحس ان الصيف دايما بداية كل حاجه حلوه صحيح اني بحس ان الشتا رومانسي اكتر بس برضه الصيف هوه بداية الشراره في اي علاقه مرحب بالصيف و بلاويه و الي بيجرى فيه

نقطة تحول 2

2007-05-11T15:59:00.000-07:00

ركوب الطياره دايما و لو ركبتها مليون مره بحس ان كل مره ليها جو تاني مختلف الحمدلله معنديش خوف او رهبه من الطيران بس بيبقى جو مليان دايما قلق و اثاره ووشوش كتيره بتحس ان كل واحد شايل حكايه و قصه غير التاني و الاهم من كده انك لو مسافر لوحدك بيكون انت و حظك مين الي حيقعد جمبك و الموضوع ده مهم جداا حته لو الرحله 10 دقايق ....المهم الناس غريبه اوي مع ان كل واحد معاه رقم الكرسي و الطياره مستنيه مش حتروح في حته قبل ما كل الناس تركب لكن برضه تلاقي ناس تجري و تزق و تديلك كتف و تهجم على بوابة الدخول زي ما يكون الي يلحق يقعد في كرسي انا من عوايدي اني استنى لغاية اخر واحد يدخل كده كده مكاني محجوز و كمان بكون مستني عشان افاجا نفسي بالي حيقعد جمبي عشان انا غالبا جدا بسافر لوحدي الا مرات نادره و اخر مره سافرت مع حد كانت من اجمل مرات حياتي و دي حكايه تانيه حيجي وقتها المهم الناس طلعت و انا دخلت الطياره و جي مكاني جمب الشباك و انا بصراحه عيل اوي في موضوع الشباك ده بحب اكون جمبو عشان اشوف مصر من فوق و اقعد اسرح طول الرحله في الفضا و انا باصص بره الشباك و اخير جي الي حيقعد جمبي قعد جمبي شاب صغير في السن نوعا ما 19 سنه او اصغر كمان شكلو روش انا مكنتش مستني مزه او حاجه بس المهم يكون حد عندو زوق و ميرغيش كتير و ميعدش يحط ايدو على مسند الكرسي بتاعي يبرطح في القعده الشاب قعد من غير و لا كلمه الطياره بتجهز دماغي مولع من الصيام و دوشة المطار و مش عايز افكر في حاجه خصوصا اني مسافر لمجهول شايل التفكير لبعدين لما تقوم الطياره دورت وشي ناحية الشباك مطار القاهره جميل مش قادر مفكرش حغيب المرادي قد ايه عن مصر لالا مش عايز افكر ابص قدامي و اشوف الناس الي في الطياره صوت اطفال بتعيط ياااساااااااتر دي ارخم حاجه عياط طفل جوه سينما او مسرح او طياره امو مش عارفه تسكتو و ابو متنح بيبص على الميضيفات و دول حكايه تانيه الحاجه المظيفه مش معبره حد و شكلها مخنوق من الناس و المعامله كده مش و لا بد اكنها طيارة ابويا الحاج ..شوفو الي يركب طياره اكيد عارف ان اسوا حاجه و الطياره و اقفه التكيف بيكون ضعيف و بيكون دوشه و تحس ان الوقت بيمشي بالعافيه الشاب الي جمبي ماسك مجله بيقرأ فيها بحاول ابص معاه فيها و لو ان لو حد عمل معايه كده حتخنق بس اعمل ايه مليت من القعده و السجاره ممنوعه الطياره زحمه اوي مليانه و المضيفين رايحين جايين زي الي بيولدو حد ناقص يندهلو فين حلة الميه السخنه زي الدايه بتاعة زمان و في ناس واقفين في الطرقه و الدنيا هيصه و مش باين اخرتها ايه ابص من الشباك تاني بشرة خير العربيات الي بتزود الطياره بالاكل و البنزين و كده بدات تبعد و نفس الوقت الناس بدات تقعد مكانها و باب الطياره غالبا اتقفل و بدا شوية هدوء ما عدا صوت العياط بتاع الاطفال و اخيرا صوت الطياره بيعلى و لو انو اعلى من الطبيعي من كتر السفر بتعرف الطبيعي من اللي مش طبيعي عموما انا مبخدش في بالي و اقلق من الحاجات دي الي كاتبو ربنا حيصير و فجاه اتحركت الطياره و ياريتها ما اتحركت .....و لينا تكمله

ما احلى الرجوع

2007-05-10T16:51:00.000-07:00

من غير كمبيوتر و لا نت 40 يوم بحالهم كانت ايام صعبه بعد ما اتعودت ادخل النت كل يوم و اكلم كل الي بحبهم و و اكون مع اهلي و ناسي و احس اني مسبتش مصر اقعد اربعين يوم من غير نت و لا كمبيوتر بصراحه كانت صعبه اوي بس الحمدالله رجعت تاني اون لاين و لينا كلام

ما بين التعديل الدستوري و القمه العربيه و تعادل الاهلي مع المحله

2007-03-29T16:26:00.001-07:00

كل التركيز الاعلامي اتجه ناحية التعديل الدستوري في مصر و الي حصل فيه و مش صدفه ان يكون قبل القمه بيوم و بحسبه بسيطه و خبره ابسط في نفسية الشعب المصري تتنقل التغطيه الاعلاميه للقمه العربيه و الناس تنسى و تنشغل بالي بعده و بعدها بيوم تشوف المدرجات و حوار الساعه من التعديل و القمه العربيه للتعادل بين المحله و الاهلي عملية بستره سخونه شديده بعدها بروده جامده و بين الاتنين الناس تاهت و نسيت و خلاص الي عده عدى و الي مش عاجبو عندو البحر الابيض و الاحمر و خليج العقبه و خليج السويس و نهر النيل اي حاجه منهم يشرب للصبح و كل سنه و انتو طيبين و خلاص كده .عموما التعديل اصبح امر واقع و اصبح قانون و الامل الوحيد ان الشعب يحترم نفسو و يتلم و يبطل الي بيعملو و يسيب الناس الي فاهمه تشوف شغلها و يا دار ما دخلك شرفيها ايه يعني عدلو شوية مواد هيه الدنيا خربت عادي كلها 30 او 40 سنه و يجي واحد تاني يعدلها و بكره ربنا يعدلها على الكل ....ربنا كبير انا قصدي على الشعب المفتري طبعا الي مبيعجبوش العجب يعني الناس شايفه المصلحه للشعب الشعب حيفهم اكتر منهم من لقطات التلفزيون المصري الجميل للشارع المصري و كمان من الجزيره شوفت ناس طيبين اوي منهم واحده ست قالت كلمه جميله خالص قالت يعني هوه الريس حيعمل فينا حاجه وحشه اكيد لاء .....بكره تتعدل

لا حول الله

2007-03-28T16:32:00.000-07:00

لا مش قادر انا مش عايز اكتب في السياسه تاني مش قادر بس حرام و الله..... استفتاء....لا حول الله ..حسبي الله و نعم الوكيل بس كفايه كده في برنامج و اتنين طلع شيوخ التلفزيون و هات يا كلام من نوع و اطيعو الله و الرسول و اولي الامر و انك لو مقولتش نعم للتعديل حتروح النار ....بغض النظر عن التعديل و الدستور بس و الله حرام كده... بجد عيب

نقطة تحول 1

2007-03-24T16:36:00.000-07:00

المكان \مطار القاهره
الزمان\ 17 \10\2004
تالت يوم رمضان افتكر كان كده اليوم ده كان يوم ايه في الاسبوع مش فاكر الساعه خمسه و نص فاضل دقايق على الادان مفيش زحمه اوي على كاونتر الوزن في نوع من الهدوء غريب على مطار القاهره ممكن الكرسي الي مفيش قدامه حد بكل ادب رد الموضف الي على الكاونتر حاضر معلش اصل انا طويل حبتين و مبقدرش اتني رجلي كتير ده غير غلاسة الي ممكن يقعد قدامك و يرجع ضهر الكرسي للاخر و تفضل مزنوق طول الرحله خلصت الكاونتر بهدوء ناحية الجوازات على فين انشاءالله ..الكويت ختمت الجواز ختم المغادره اتغير مطار القاهره من جوه عن الاول بكتير انا دخلتو كتير اوي من و انا طفل بس يفضل في حاجات مبتتغيرش الكافتريا بتاعة صالة السفر زي ما هيه نفس الموضفين و طريقة التعامل و فنجان الشاي الي بخمسه جنيه بس المطار نظف عن الاول بكتير عندي دايما فظول غريب ابص في وشوش الناس الي مسافره و افضل اتمشى و احرق في سجاير زي ما تكون اخر مره حشرب سجاير فيها بس عملو غرفة المدخنين الي بتيقلي الغرض الحقيقي منها انك تبطل سجاير مدخنه بجد عموما انا لازم اعمل شوية تلفونات قبل ما اطلع الطياره حكلم اختي و ناس كتير اطمنهم انو كلو تمام و اني اول ما حوصل حبعتلهم رقمي و كده يعني دماغي بتلف و قلبي مقبوض من السفريه دي .....اصل الحكايه انا عشت في الكويت عمر بحالو بس خلصت ثانوي و على مصر و الجامعه و بعدين اتخرجت و اشتغلت محامي تحت التمرين بميت جنيه عقبال عند كو ودي قصه تانيه خالص المهم اهل العبدلله مقتنعوش ان في مستقبل لاي حد شاب في مصر و عنها صدروني على اول طياره مع ان انا ليه تجارب قبل كده في الكويت و الامارات و اماكن تانيه و دي قصه تانيه خالص المهم متوفقتش اوي بس القرار كان ملزم عشان انا كان في اتفاق بيني و بينهم اني ادي مصر فرصه و قعدت كام سنه و مصر مبينتش اي كرامه مع العبدلله خصوصا اني محامي و دول على قفا مين يشيل و علاقات عاطفيه فاشله و قهواي للفجر و كوفي شوبات غاليه و رخيصه و قربت اشرب بانجو فكانت النتيجه السفر لبلاد البترول بلاد بتركب البورش و الهمر الخلاصه انا اهو في المطار زي العبيط لا عارف جي منين و لا رايح فين بس سلمتي امري لله و خلاص انا في المطار و فاضل نص ساعه و نطلع الطياره لازم اروح ناحية البوابه بس اشرب علبة سجاير الاول و بعدين اروح اركب الطياره و كنت فاكر ان الموضوع بالبساطه دي بس ليه لاء انا سافرت مليون مره قبل كده لكن الي حصل كان غير كل مره و كانت غلطه ......و دي الحكايه ايه الي حصل في الطياره دي قصه مفيش زيها

خرج فؤادي خلفها و لم يعد

2007-02-26T15:22:00.000-08:00

يَا قَوْمِ إِنِّي عَاشِقٌ..وَبِحُبِّهَا..وَاللهِ إنِّي مُتَّهَـمْ !

.وَهِيَ الْخَصِيمَةُ فِي هَوَايَ..

هِيَ الشَّفِيعَةُ وَالْحَكَمْ.

وَهِيَ البِدَايَةُ والنِّهَايَةُ..

وَالوُجُودُ بِغَيْرِ ضِحْكَتِهَا..

عَدَمْ.

2007-02-07T14:03:00.000-08:00

أحبكِ.. ففي الحب يشتاق الرجل لأشياء كثيرة.. ولكن في العشق لا يشتاق سوى إلى امرأة..

يارب

2007-02-03T14:03:00.000-08:00

في ليله مطر و في غرفه ضيقه و النفس شايله و مخنوقه والناس بعيده و مشغوله و الوحده صعبه و اقرب الناس بعيده و محدش حاسس بالي في الصدور و النفوس و القلب حمله زايد و الهموم بتزيد و العقل محتار و الدنيا تكون اضيق من خرم ابره ....فجأه ياذن الاذان و صوت الله اكبر يعلى فوق كل صوت و القلب يكبر و يتشاهد و يسبح بحمده فجأه تزول الهموم و تزول الغيوم و يطلع نهار فجر جديد يمكن متحلتش المشكله يمكن الهم استخبى و مهربش يمكن كل حاجه حترجع زي ماكانت و اصعب بس لحظة الصفا و الهدوء تستاهل نعيش عشانها يوم تاني و فجر تاني ....يااااااارب

يخرب عقلك يا قلبي مجنون من بين المجانين

2007-01-22T15:17:00.000-08:00

جنون الحب جنون بتحبها يا قلبي اشرب يا سيدي انت تسهر و تفكر و تعدي عليك اليالي الليله بسنه سهران تتقلب شمال و يمين مين سائل فيك مين معبرك تتكلم زي الشاحتين و بقيت من فئة المساكين و عقلك الله يعوض عليك فيه بقيت زي المجاذيب و مين يا مسكين سائل فيك دوختيني و بهدلتني الله يجازيك كل ده و لا حد يا مسكين سائل فيك شويه تعمل زعلان و شويه تكون ولهان لاكده عاجب و لا كده نافع تفتكر هيه شيفاك و لا حسه بيك من بين الملاين يالله اشرب عشان تبطل تقول انا و الحب اتنين عاشقين ده انت وا لحب اتنين مجانين هيه في طريق و انت في طريق ولا التايهين و تعشم نفسك و تقول حنتلاقى خليك في الوهم يا مسكين أخرتك مستشفى الماجنين جزمه أنت في رجليها و مش عايش عشت البني ادمين خليك ورآها و شوف مين حيعبرك بعدها مين انت الي جبتو لنفسك مكنا في الدنيا عايشين هيه تفكر في الطلب قبل ما تفتح عين و تقفل عين تقولها امين و انت يدلدل لسانك يمكن تفتكر تبوصلك و تقولك انتى يا بني مين ده شحات الغرام بيحنو عليه بكلمه و نظره و انت من بعيد لبعيد بتستنى يمكن قلب يحن ولا يميل ده عشم ابليس في الجنه انت بتحلم تقولك بص يا بني انت مين و انا مين انت في الاخر خاين و اناني و هيه مين قدها مين و تفرح و تنبسط حتى لو كلمتك من حين لحين و هيه لو كلمتها كل يوم تقولك برده انت مين كل ده و شايل و ساكت و متقدرش تقول انا من كل ده مين حواليها ناس و ناس و ناس و قلبها هنا يميل و هناك شويه يميل و تيجي عندك و تقولك انت برده مين الله يخرب بيتك يا قلبي و الله ما عايز اعرفك لميت علينا الشماتين و لو بايدي كنت اوقفك وعن النبض امنعك تستاهل الي بتعملو فيك و لو اشتكتلي في يوم مش حعبرك و اقولك هوه انا اعرفك انتى يابني مين ... يخرب عقلك يا قلبي مجنون من بين الماجنين

صوره و احساس

2007-01-17T16:44:00.000-08:00

الحب

2006-11-09T16:25:00.000-08:00

يا حبيبي إيه اجمل م الليل واتنين زينا عاشقين تايهين ما احناش حاسين العمر ثواني والا سنين حاسين اننا بنحب وبس عايشين لليل والحب وبس يا حبيبي الحب حياتنا وبيتنا وقوتنا للناس دنيتهم واحنا لنا دنيتنا وإن قالوا عن عشاقه بيدوبوا في نار أشواقهأهي ناره دي جنتنا الحب عمره ما جرح .. ولا عمر بستانه طرح غير الهنا وغير الفرح يا حبيبي يالله نعيش في عيون الليل ونقول للشمس تعالي بعد سنة .. مش قبل سنة دي ليلة حب حلوه بألف ليلة وليلة بكل العمر .. هو العمر إيه غير ليلة زي الليلة

البنت الشقيه

2006-10-23T19:52:00.000-07:00

شوف الخفه .. ام الشعور اللفه فوق اللفه غير ام الشعر طويل
و المقصوعه و رجلها فوق اختها مرفوعه تستنظر الطوموبيل
و الحرانه من المعاصم للكتاف عريانه زي اللي غاسله غسيل
و الملفوفه باين عصبها و النهود مكشوفه ما خلت الا قليل
و المحتاره بالشنطه و الشمسيه و النضاره رايحه على التمثيل
و الغندوره تحسبها لولا مشيتها صنيوره والا ام خصر نحيل
طالع نازل لولا ما هي ماسكه دراع الراجل من لمسه وحده تميل

بيرم التونسي

العنكبوته

2006-10-23T19:00:00.000-07:00

يا عنكبوتة كملي عشك لا حد حيزيحك ولا ينشك لمي مهاجرينك وثبتي دينك اتمطعي وخدينا في وشك بلاد بلا عزة ممكن تجيبي أجلها من هزة بلا ضفة بلا غزة بلا مصر بلا أردن بالدم رشي اللي بماء رشك وكملي عشك لمي مهاجرينك ولو ملايين يا عنكبوتة إحنا مش فاضيين مدي الخيوط خيط خيط واكسي كل الحيط نامي ف أمان واتمطعي ف فرشك من وَشنا ما بنسمعوش وشك لمي مهاجرينك وتعاليليلا تهم تباريري وتعاليلي أنا في الخلا بانفخ شعاليلي أنظم قوافيِِّا وتفاعيليوما تلقينيش ساعة يعوزني الفعل أغش نفسي وعمري ما أغشك واحش رؤوس أهلي ولا أحشك حتعيشي أبد الدهر حتوحديها إنتي نهر ونهر نشي اللي ما قدروش علي نشك أنا زي ما بعت السنين الخرس ورضيت بربع الربع وخمس الخمس مجاني حاوهب لك عيون القدس مين اللي سألك تتركي عرشك طب د احنا ُخدامك في النوم بنوحي لك بأحلامك واحنا اللي بنحققها قدامك آسف ؛ سكوتي ربما داوشك فاتربصي بينا ولا يهمك دمانا فدا دمك وتبعترينا واحنا بنلمك ولو تحاصرك الأمم ويكتفوكي بالتهم احنا سبيلك للخلاص في الكون لما يضيق الحال دايماً بيطلع مننا مجنون يهتف : يعيش صهيون ونغش بعضينا ولا نغشك بالعكس : بندلع وبنهشك ناكل في بعض فيتملي كرشك وقرشنا ف ثانية يصير قرشك يا عنكبوتة إنسي أصواتنا وزعيقنا وصواتنا ودم أحياءنا وأمواتنا هدي عشوشنا وكملي عشك لا حد حيزيحك ولا ينشك

الأبنودي

صوت حبيبتي

2006-10-13T18:31:00.000-07:00

صوتك يا بنت الإيه كأنه بدن
يرقص يزيح الهم يمحي الشجن
يا حلوتي و بدنك كأنه كلام
كلام فلاسفه سكروا نسيوا الزمن
عجبي !!!

صلاح جاهين

شاب و عمري الف عام

2006-10-13T18:04:00.000-07:00

أنا شابّ لكن عمري ولاألف عام وحيد ولكن بين ضلوعي زحام خايف ولكن خوفي مني أنا أخرس ولكن قلبي مليان كلام عجبي !!!!نظرت فوقي للنجوم وأنا ساير رجليّا عِتْرت في الحفر والحجاير بقيت أقول وأنا ع التراب : ياسلام مش بس عبرة أخدت لكن عبايرعجبي!!!!سرداب في مستشفى الولاده طويل صرخات عذاب ورا كلّ باب وعويلو في الطريق متزوقين البنات متزوقين للحب والمواويل عجبي!!سمعت نقطه ميّه جوه المحيط بتقول لنقطه ماتنزليش في الغويط أخاف عليكي م الغرق..قلت أناده اللي يخاف م الوعد يبقى عبيط عجبي

صلاح جاهين

على اسم مصر

2006-10-13T15:55:00.000-07:00

على اسم مصر

التاريخ يقدر يقول ما شاء
أنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة حرب
باحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلقيني جنبها في الكرب
والنبض ينفض عروقي بألف نغمة وضرب
على اسم مصر

صلاح جاهين

الحب له وجه واحد

2006-10-10T17:30:00.000-07:00

الحب له وجه واحد اذا احببت يوما و اعطيت حب و مشاعر فلا تقبل الا ان تاخذ حب و مشاعر فلا تعطي دون ان تاخد والا اصبح حبا مشوها فمن يبحث عن الحب لا يرضى باقل من الحب و التي اعرفها تغمريني حبا وعطفا وحنانا وتملك من العاطفه ما يجعلني اتسائل من اين لها بهذا كله من مشاعر وحب وحنان كانه نبع من الحب لاينقطع ولا يقف عند حد تغمرني بمشاعرها الدافئه المتدفقه تاره تراها حبيبه و تاره تراها اخت و تاره تراها ام و تاره تراها الصديقه المخلصه عجزت عن معرفة مصدر هذا كله ولكني لم اعجز عن استيعابه كله و كم اتمنى ان استطيع ان ارد لها جزء من هذا الحب ............حبيبتي اشكرك و احبك

احمد فؤاد نجم

2006-10-07T07:03:00.000-07:00

طاطي راسك طاطي طاطي .. انت ف وطن ديمقراطي .. انت بتنعم بالحرية .. بس بشرط تكون مطاطيلما تكون شغال بذمة .. خايف على مصلحة الأمة .. شغلك يطلع من غير لازمة .. علشان مبيعلاش غير واطي طاطي راسك طاطي طاطي .. انت ف وطن ديمقراطيلما حاميها يكون حراميها .. وبلاده ورا ضهره راميها .. طالع نازل واكل فيها .. مسنود بالبدلة الظباطي طاطي راسك طاطي طاطي .. انت ف وطن ديمقراطيلما شقاك يصبح مش ليك .. فقرك سد السكة عليك تتلفّت تلقى حواليك .. إما حرامي و إما عقاطي طاطي راسك طاطي طاطي .. انت ف وطن ديمقراطيلماتلاقي بلاد الدنيا .. فيها البني آدم حاجة تانية .. وانت في الطبقات الدنيا .. قرد مسلسل أو وطواطي طاطي راسك طاطي طاطي .. انت ف وطن ديمقراطيلما الجهلة يبقوا أمامك .. أو فوقك ماسكين ف زمامك .. ويسوقك ع الهلكة إمامك .. تشرب م السم السقراطي طاطي راسك طاطي طاطي .. انت ف وطن ديمقراطيلما الكلمة تكون بتدينك .. لما تخبي ف قلبك دينك .. لما الذل أشوفه ف عينك .. هات إحباطك على إحباطي طاطي راسك طاطي طاطي انت ف وطن ديمقراطي .. انت ف وطن ديمقراطي

محاولات عبثيه

2006-10-07T05:42:00.000-07:00

حيث لم يكن على الأرض بشر بعد .... كانت الفضائل والرذائل.. تطوف العالم معا".. وتشعر بالملل الشديد.... ذات يوم... وكحل لمشكلة الملل المستعصية... اقترح الأبداع.. لعبة.. وأسماها الأستغماية.. أو الغميمة.. أحب الجميع الفكرة... وصرخ الجنون: أريد أن أبدأ.. أريد أن أبدأ... أنا من سيغمض عينيه.. ويبدأ العدّ... وأنتم عليكم مباشرة الأختفاء.... ثم أنه اتكأ بمرفقيه..على شجرة.. وبدأ... واحد... اثنين.... ثلاثة.... وبدأت الفضائل والرذائل بالأختباء.. وجدت الرقة مكانا لنفسها فوق القمر..